சேலம் நவ 5,
தங்கள் புகார் மீது உரிய நடவடிக்கை எடுக்காததை கண்டித்தும், எம்எல்ஏ அருளை கைது செய்ய வலியுறுத்தியும் மாவட்ட காவல் கண்காணிப்பாளர் அலுவலகத்தில் அன்புமணி ஆதரவாளர்கள் இன்று தர்ணா போராட்டத்தில் ஈடுபட்டனர். காவல்துறை ஒருதலை பட்சமாக செயல்படுவதாக அன்புமணி ஆதரவு எம்எல்ஏக்கள் குற்றம்சாட்டினர்.
சேலம் நெத்தி மேடு பகுதியில் உள்ள காவல் கண்காணிப்பாளர் அலுவலகத்துக்கு மேட்டூர் தொகுதி எம்எல்ஏ சதாசிவம், மயிலம் தொகுதி எம்எல்ஏ சிவக்குமார், செஞ்சி தொகுதி முன்னாள் எம்எல்ஏ கணேஷ்குமார் ஆகியோர் தலைமையில் வருகை தந்த பாமக நிர்வாகிகள் மற்றும் தொண்டர்கள், தங்கள் தரப்பு புகார் மீது உரிய நடவடிக்கை எடுக்காததை கண்டித்தும், எம்எல்ஏ அருள் மீது நடவடிக்கை எடுக்க வலியுறுத்தியும் தர்ணா போராட்டத்தில் ஈடுபட்டனர்.
எம்எல்ஏ அருள் மீது வழக்குப்பதிவு: தொடர்ந்து, எம்எல்ஏ அருள் உட்பட 40 பேர் மீது ஏத்தாப்பூர் போலீஸார் வழக்குப்பதிவு செய்தனர்.
இதையடுத்து, எம்எல்ஏக்கள் சதாசிவம், சிவக்குமார் உள்ளிட்டோர் செய்தியாளர்களிடம் கூறுகையில், இந்த சம்பவத்தில் காவல்துறை ஒருதலை பட்சமாக செயல்படுகிறது. மோதல் சம்பவம் குறித்து இரு தரப்பிலும் புகார் அளிக்கப்பட்டுள்ளது. ஆனால், அன்புமணி தரப்பினர் கொடுத்த புகார் மீது காவல்துறை சரியான நடவடிக்கை எடுக்கவில்லை. எம்எல்ஏ அருளுக்கு சாதகமாக காவல்துறை ஒருதலை பட்சமாக செயல்படுவது ஏன்? எங்கள் தரப்பில் கைது செய்யப்பட்ட 7 பேரையும் உடனடியாக விடுவிக்க வேண்டும். நடுநிலையான விசாரணை நடத்தப்பட வேண்டும்.
பொதுவெளியில் அன்புமணி குறித்து தவறாக பேசுவதை நிறுத்திக் கொள்ள வேண்டும்: அருளுக்கு நாவடக்கம் வேண்டும். அன்புமணி குறித்து ரகசியங்களை வெளியிடுவேன் என கூறி, தவறாக சித்தரிக்கும் முயற்சியில் ஈடுபடுகிறார் அருள். அருள் செல்வன் சாகும் வரை எங்களுடன் தான் இருந்தார். அருளுக்கு உண்மையான தைரியம் இருந்தால் அருள்செல்வன் குறித்து வெளிப்படையாக சொல்ல வேண்டும். தொடர்ந்து, உண்மைக்கு மாறான தகவல்களை கூறிவருவதை எம்எல்ஏ அருள் உடனடியாக நிறுத்திக் கொள்ள வேண்டும் என தெரிவித்தனர்.
இந்த பேட்டியின் போது, பாமக நிர்வாகிகள், தொண்டர்கள் திரளானோர் உடனிருந்தனர்.
