காஞ்சிபுரம் நவ 6,
108 வைணவ திவ்ய தேசங்களில் ஒன்றான தேவராஜ ஸ்வாமி திருக்கோவிலில் உள்ள தங்கம் மற்றும் வெள்ளி வேயப்பட்ட பல்லி சிலைகளை தரிசனம் செய்ய நாள்தோறும் ஆந்திரா ,கர்நாடகா, கேரளா மற்றும் பல்வேறு வெளிமாநிலங்களில் இருந்து ஆயிரக்கணக்கான பக்தர்கள் வந்து செல்கின்றனர்.
தங்க பல்லி வெள்ளி பல்லி கோவில் என பிரசித்தி பெற்று விளங்கும் இக்கோவிலில் சூரியன் சந்திரன் உடன் இருக்கும் வெள்ளி பல்லி தங்க பல்லி ஆகியவை பக்தர்களின் கை பட்டு மிகவும் தேய்ந்து போனதாக கூறப்படுகிறது.
மேலும் குறுகலான படிகளில் ஏறி பள்ளிகளை தொட்டு தரிசனம் செய்ய பக்தர்கள் சிரமம் அடைந்து வந்தனர்.
இதன் காரணமாக பல்லி சிலைகள் இருந்த இடத்தில் புனரமைப்பு செய்ய முடிவு செய்யப்பட்டது.
அதனைத் தொடர்ந்து பழைய பல்லி சிலைகளை தாழ்வான பகுதியில் அமைக்கப்பட்டு கடந்த சில மாதங்களாக பக்தர்கள் தரிசனம் செய்து வந்தனர்.
இந்த நிலையில் பழைய இடம் புனரமைக்கப்பட்டதை தொடர்ந்து தங்க பல்லி வெள்ளி பல்லி சிலைகளும் மாற்றி அமைக்கும் பணி நடைபெற்று வருகிறது.
இந்த நிலையில் ஸ்ரீரங்கத்தைச் சேர்ந்த ரங்கராஜ நரசிம்மன் என்பவர் பழமையான தங்கம் வெள்ளி பல்லிகள் காணாமல் போய் உள்ளதாகவும், தற்போது நடைமுறையில் உள்ள பல்லி சிலைகளை கோவில் நிர்வாகம் மாற்ற முயற்சிக்கிறது என சிலை கடத்தல் தடுப்பு போலீசாருக்கு புகார் தெரிவித்தார்.
புகார் வந்ததைத் தொடர்ந்து சிலை கடத்தல் தடுப்பு பிரிவு போலீஸ் டிஎஸ்பி சம்பத் தலைமையில் சிலை கடத்தல் தடுப்பு பிரிவு போலீசார் காஞ்சிபுரம் தேவராஜ சுவாமி திருக்கோவிலுக்கு நேரில் வந்து விசாரணை மேற்கொண்டனர்.
சிலை கடத்தல் தடுப்பு பிரிவு போலீசார் கோவில் வளாகத்தில் பார்வையிட்டு சோதனை மேற்கொண்டு கோவில் பட்டாச்சாரியார்கள், ஸ்தானியகர்கள், கோவில் மணியக்காரர்,
கோவிலின் நிர்வாக அறங்காவலரும் உதவி ஆணைருமான ராஜலட்சுமி உள்ளிட்டோரிடம் தீவிர விசாரணை மேற்கொண்டனர்.
கோவில் நிர்வாக அறங்காவலர் ராஜலட்சுமியிடம் 13 கேள்விகள் கேட்டு பதிலைப் பெற்று பதிவு செய்தனர். மேலும் விசாரணைக்கு ஆஜராகமாறு சம்மன் வழங்கி உள்ளனர்.
சிலை கடத்தல் தடுப்பு பிரிவு போலீசார் சுமார் 5 மணி மணி நேரத்திற்கும் மேலாக கோவில் வளாகத்தில் தங்க பல்லி வெள்ளி பல்லி விவகாரம் சம்பந்தமாக விசாரணை மேற்கொண்ட சம்பவம் காஞ்சிபுரம் பகுதியில் பெரும் பரபரப்பை ஏற்படுத்தி உள்ளது.
