நாம் தமிழர் கட்சி ஒருங்கிணைப்பாளர் சீமானுக்கு கோவை பத்திரிகையாளர் மன்றம் கடும் கண்டனம்

கோவை நவ 23,

புதுச்சேரியில் செய்தியாளர் மீது கொலைவெறி தாக்குதல் நடத்திய நாம் தமிழர் கட்சியினர் – செய்தியாளரை ஒருமையில் பேசி, மிரட்டல் விடுத்த சீமானுக்கு கோயமுத்தூர் பத்திரிகையாளர் மன்றம் கடும் கண்டனம்

புதுச்சேரியில் இன்று நாம் தமிழர் கட்சியின் தலைமை ஒருங்கிணைப்பாளர் சீமானின் செய்தியாளர் சந்திப்பு நடந்துள்ளது. இதில் ஊடகவியலாளர்கள் கலந்து கொண்டு, சீமானிடம் கேள்விகளை எழுப்பியுள்ளனர். குறிப்பாக தமிழ்நாட்டில் தற்போது மேற்கொள்ளப்பட்டு வரும் எஸ்.ஐ.ஆர் குறித்து செய்தியாளர்கள் கேள்வி எழுப்பியுள்ளனர். இதில் பங்கேற்ற கலைஞர் தொலைக்காட்சி செய்தியாளர் ராஜீவ், சீமானிடம் எஸ்.ஐ.ஆர் குறித்த கேள்விகளை எழுப்பியுள்ளார்.

ஆரம்பம் முதலே தனது பதிலை நிறுவும் வகையிலேயே பதிலளித்து வந்த சீமான், ஒரு கட்டத்தில் செய்தியாளர் ராஜீவை ஒருமையில் பேசியதோடு, அச்சிலேற்ற முடியாத வார்த்தைகளாலும் நேரலையிலேயே பேசியுள்ளார். மரியாதைக்குரிய முறையில் பதிலளிக்குமாறு செய்தியாளர் ராஜீவ் வலியுறுத்திய போது, சீமான் தன்னிலை மறந்து தொடர்ந்து அவதூறாக பேசியுள்ளார். இதனால் செய்தியாளர் சந்திப்பு நிறைவடைந்த நிலையில், சீமானுடன் இருந்த நாம் தமிழர் கட்சியினரும், சில குண்டர்களும், வெளியில் வந்த ராஜீவுடன் வாக்குவாதம் செய்து, அவரை கொலைவெறியோடு கடுமையாக தாக்கியுள்ளனர். இதில் படுகாயமடைந்த ராஜீவை, சக செய்தியாளர்கள் மீட்டு, சிகிச்சைக்காக மருத்துவமனைக்கு அழைத்து சென்றுள்ளனர்.

மருத்துவமனையில் செய்தியாளர் ராஜீவிற்கு தீவிர சிகிச்சை அளிக்கப்பட்டு வருகிறது. அவர் விரைவில் உடல்நலம் தேறி பணிக்கு திரும்ப வேண்டும் என விரும்புகிறோம். அதே சமயம்,  சீமானின் இந்த செயல் கடும் கண்டனத்திற்குரியது என்பதோடு, அருவருக்கத்தக்கதாகவும் உள்ளதாக கோயமுத்தூர் பத்திரிகையாளர் மன்றம் கருதுகிறது. கோவையில் சில நாட்களுக்கு முன்பு, பெண் செய்தியாளரிடம் அச்சிலேற்ற முடியாத வார்த்தையில், சீமான் பேசினார். இப்போது செய்தியாளரிடம் தன்னிலை மறந்து ஒருமையிலும், கடுமையான சொற்களையும் பேசுவதோடு, தனிப்பட்ட குரோதத்தை வெளிப்படுத்தி, குண்டர்களை கொண்டு தாக்க தூண்டுகிறார். இவை யாவும் சீமான் இயல்பான மனநிலையில் இல்லையோ என்ற சந்தேகத்தை ஏற்படுத்துகிறது.

செய்தியாளர் ராஜீவை தாக்கிய நபர்களை புதுச்சேரி காவல்துறை கைது செய்து கடுமையான நடவடிக்கை எடுக்க வேண்டும் என கோயமுத்தூர் பத்திரிகையாளர் மன்றம் வலியுறுத்துகிறது. அதே நேரம், இந்த தாக்குதல் சம்பவத்திற்கு சீமானும் பொறுப்பாளி என்ற அடிப்படையில், அவர் மீது சட்ட ரீதியான நடவடிக்கை எடுக்க வேண்டும் என கோயமுத்தூர் பத்திரிகையாளர் மன்றம் வலியுறுத்துகிறது. சீமான், இந்த தாக்குதல் சம்பவத்திற்கு உடனடியாக வருத்தம் தெரிவிப்பதோடு, சம்பந்தப்பட்ட செய்தியாளரிடம் மன்னிப்பும் கேட்க வேண்டும் என வலியுறுத்துகிறோம்.

இப்படிக்கு

கோயமுத்தூர் பத்திரிகையாளர் மன்றம்