திருப்பூர் 8-வது வார்டில்
வடிகால் அமைக்க அரசுக்கு ரூ.10 கோடி மதிப்பில் நிலம்
வழங்கிய குடும்பத்தினருக்கு பாராட்டுவிழா
மேள, தாளம் முழங்க ஊர்வலமாக
அழைத்து செல்லப்பட்டு கௌரவிப்பு.
திருப்பூர் மாநகராட்சி 8-வது வார்டுக்குட்பட்ட மும்மூர்த்திநகர், டீச்சர்ஸ் காலனி, கருப்பராயன்நகர், லட்சுமி கார்டன் உள்ளிட்ட பகுதியில் கடந்த பல ஆண்டுகளாக முறையான மழைநீர் வடிகால், கழிவுநீர் கால்வாய் வசதி இல்லாததால் ஆண்டுதோறும் மழைக்காலங்களில் குடியிருப்புகளுக்குள் மழைநீர் புகுந்து பாதிப்பை ஏற்படுத்தி வந்தது. மழை நீர் வடிகால் மற்றும் கழிவு நீர் பாதைகள் அமைக்க இடம் இல்லாத காரணத்தால் இந்த பிரச்சனைக்கு தீர்வு காணப்படாமலே இருந்து வந்தது.
இந்த நிலையில், இந்த குடியிருப்புக்கு அருகே ஒட்டியுள்ள தனியாருக்கு சொந்தமான இடத்தை பெற்று அதில் மழை நீர் வடிகால் அமைக்க
8-வது வார்டு திமுக கவுன்சிலர் வி.வி.ஜி.வேலம்மாள் காந்தி மேற்கொண்ட முயற்சியின் பலனாக அப்பகுதியை சேர்ந்த ஓய்வு பெற்ற ஆசிரியர் கிருஷ்ணசாமி வள்ளியம்மாள் குடும்பத்தினர் கழிவுநீரை வெளியேற்றும் வகையில் ரூ.10 கோடி மதிப்பிலான நிலத்தை மக்களுக்கு பயன்படும் வகையில் அரசுக்கு தானமாக வழங்கி உள்ளனர். இந்த நிலையில் அந்த குடும்பத்தினருக்கு பாராட்டு விழா மற்றும் பணிகளுக்கான பூமிபூஜை விழா நடைபெற்றது. நிகழ்ச்சிக்கு கவுன்சிலர் வேலம்மாள் காந்தி தலைமை தாங்கினார். இந்த நிகழ்ச்சியில், மாநகராட்சி மேயர் தினேஷ்குமார், மாநகராட்சி துணை மேயர் எம்.கே.எம்.பாலசுப்பிரமணியம் உள்ளிட்ட பலர் கலந்து கொண்டனர். முன்னதாக கவுன்சிலர் வேலம்மாள் காந்தி ஏற்பாட்டில் நிலம் வழங்கிய குடும்பத்தினர் மும்மூர்த்தி நகர் பஸ் நிறுத்தத்தில் இருந்து பூரண கும்ப மரியாதையுடன், மேள, தாளம் மற்றும் வான வேடிக்கை முழங்க பொதுமக்களுடன் ஊர்வலமாக அழைத்து செல்லப்பட்டு, கவுரவிக்கப்பட்டனர். நிகழ்ச்சியையொட்டி வள்ளி கும்மியாட்டம் மாணவர்களின் கலை நிகழ்ச்சிகள் நடைபெற்றது.
இது குறித்து இலவசமாக நிலம் வழங்கிய குடும்ப உறுப்பினர் பார்த்திபன் கூறுகையில், இந்த பகுதியில் மழை நீர் வடிகால் இல்லாமல் கடந்த 30 ஆண்டுகளுக்கு மேலாக மக்கள் அவதிப்பட்டு வந்தனர் ஆரம்ப காலத்தில் எங்களிடம் இது தொடர்பாக நிலம் கேட்கப்பட்டது ஆனால் அப்போது இருந்த கால சூழ்நிலை, பணப்பிரச்சனைகளால் நிலத்தை கொடுக்க முடியவில்லை தற்பொழுது திமுக கவுன்சிலரின் சீரிய முயற்சியால் இது சாத்தியமாகியுள்ளது. பொதுமக்களின் நலனுக்கா எங்கள் குடும்பத்தினர் மழைநீர் வடிகால் அமைப்பதற்காக 10 கோடி மதிப்பிலான இடத்தை தானமாக வழங்கி உள்ளார்கள் இது எங்களுக்கு மகிழ்ச்சியை அளிக்கிறது என தெரிவித்தார்.