தூத்துக்குடி அருகே கடல் நீர் திடீரென அரக்கு நிறமாக மாறியதால், அப்பகுதி மீனவர்கள் அச்சத்தில் மூழ்கியுள்ளனர்.

தூத்துக்குடி அக் 26,
தூத்துக்குடி மாவட்டம், ஓட்டப்பிடாரம் சட்டமன்றத் தொகுதிக்கு உட்பட்ட தருவைகுளம் கிராமத்தில் இருந்து சுமார் 250க்கும் மேற்பட்ட நாட்டுப் படகுகளில் மீனவர்கள் மீன் பிடிக்கச் செல்கின்றனர். இந்த நிலையில், தற்போது வழக்கத்திற்கு மாறாக கடல் நீரானது அரக்கு நிறத்தில் காட்சி அளிக்கிறது. மேலும், கடல் அலைகளும் அதிக ஆர்ப்பரிப்புடனும், ஆக்ரோஷமாகவும் காணப்படுகிறது.

இது குறித்து மீன்வள ஆய்வாளர்கள் கூறும் போது, தூத்துக்குடி மாவட்டத்திலுள்ள பட்டினமருதூர், சுரங்குடி, வேம்பார் ஆகிய பகுதிகள் முழுவதும் இவ்வாறு தான் அரக்கு நிறத்தில் உள்ளது. அதாவது, இங்கு பவளபாறை அதிகம் உள்ளதால் அங்கு காற்று அடிக்கும் பட்சத்தில் அது பாசியாக வெளியேறி அரக்கு நிறத்தில் உள்ளது. ஆகவே மீனவர்கள் அச்சம் கொள்ள வேண்டாம் என்று கூறியுள்ளார்.