கோவை தனியார் கல்லூரி விடுதியில் இரவில் உணவில் புழு, ஐந்து மாணவர்கள் வாந்தி, மயக்கம் : அரசு மருத்துவமனையில் சிகிச்சை – காவல் துறை விசாரணை !!!

கோவை நவ 2,


கோவை திருமலையம் பாளையத்தில் உள்ள நேரு பொறியியல் கல்லூரியில் இரவு உணவு அருந்திய  ஐந்து மாணவர்கள் வாந்தி, மயக்கம் சிகிச்சைக்காக அரசு மருத்துவமனையில் அனுமதி காவல் துறை விசாரணை நடத்தி வருகின்றனர்.

கோவை, மதுக்கரை அருகே உள்ள திருமலையம் பாளையத்தில் உள்ள நேரு பொறியியல் தனியார் கல்லூரி செயல்பட்டு வருகிறது. இங்கு 2,000 க்கும் மேற்பட்ட மாணவ – மாணவிகள் பயின்று வருகின்றனர். இதில் வெளிமாவட்டம், அண்டை மாநிலமான கேரளாவில் இருந்தும்,  அதிகளவில் மாணவ –  மாணவிகள் விடுதியில் தங்கி பயின்று வருகின்றனர்.

இந்நிலையில் பொறியியல்  விடுதியில், தனியார் கேட்டரிங் நிறுவனம கடந்த மூன்றாண்டுகளாக ஒப்பந்த அடிப்படையில்,  உணவு தயாரித்து வழங்கி வருகின்றனர். இந்நிலையில் நேற்றிரவு, இட்லி, தேங்காய் சட்னி, சாம்பார், வெள்ளை ரவை கேசரியை  சாப்பிட்ட 12 மாணவர்களுக்கு  வயிற்று வலி இருப்பதாக 12 மாணவர்கள் கூறி உள்ளனர். கேசரியில் புழு இருந்துள்ளது.  12 பேரில் 7 பேர் சிகிச்சை பெற்று திரும்பிய நிலையில் ,  தர்மபுரியைச் சேர்ந்த நிதீஷ்குமார், திருநெல்வேலியைச் சேர்ந்த விஜய் மற்றும் கள்ளக்குறிச்சி, கடலூர்  அரியலூர் மாவட்டத்தைச் சேர்ந்த 17 வயதுடைய மூன்று பேர் என 5 மாணவர்கள்  வாந்தி, மயக்கம் ஏற்பட்டு ,  மதுக்கரை அரசு மருத்துவமனையில் உள்நோயாளிகளாக சிகிச்சைக்காக பெற்று வருகின்றனர்.

மேலும் மூன்று நாட்களுக்கு முன்பு, விடுதியில் வழங்கப்பட்ட தேநீரிலும் பூச்சிகள் காணப்பட்டதாகவும், மாணவர்கள் கல்லூரி நிர்வாகத்திடம் புகார் அளித்ததாகவும்  கூறப்படுகிறது.

தற்போதைய இந்த சம்பவத்தைத் தொடர்ந்து, ஒரு சில மாணவர்கள் விடுதி முன் சிறிது நேரம் உள்ளிருப்பு போராட்டத்தில் ஈடுபட்டனர், பின்னர் கல்லூரி அதிகாரிகளுடன் பேச்சுவார்த்தை நடத்திய பின்னர் கலைந்து சென்று உள்ளனர்.

தற்பொழுது மாணவர்களின் உடல்நிலை சீராக இருப்பதாக தெரிவிக்கப்பட்டு உள்ளது.

இதுகுறித்து கே.ஜி சாவடி காவல் துறையினர் வழக்கு பதிவு செய்து விசாரணை நடத்தி வருகின்றனர்.