கள்ளக்குறிச்சி அக் 27,
கள்ளக்குறிச்சி மாவட்டம், சின்னசேலம் அருகே வனப்பகுதியில் நண்பருக்காக காத்திருந்த சங்கராபுரம் அருகேயுள்ள செம்பராம்பட்டு கிராமத்தைச் சேர்ந்த சௌந்தரராஜன் என்ற கரும்பு வெட்டும் கூலித் தொழிலாளியை சந்தேகத்தின் பேரில் வனத்துறையினர் பிடித்து விசாரித்துள்ளனர். அப்போது, வனத்துறையினர் அவரை தாக்கியதாகவும், அதில் அவர், கண் பாதிக்கப்பட்டதாகவும் கூறப்படுகிறது.
இதையடுத்து, சௌந்தரராஜனை பரிசோதித்த கள்ளக்குறிச்சி அரசு மருத்துவக் கல்லூரி மருத்துவமனையைச் சேர்ந்த மருத்துவர்கள் அவரைச் சென்னைக்கு கொண்டு செல்ல அறிவுறுத்தியுள்ளனர்.
இந்த நிலையில், அவரை ஏற்றிச்சென்ற ஆம்புலன்ஸை தியாகதுருகம் பகுதியில் வனத்துறையினர் தடுத்து நிறுத்தியதால் அவர்களுக்கும், சௌந்தரராஜன் உறவினருக்கும் இடையே கடும் வாக்குவாதம் ஏற்பட்டது.
வழக்கில் தொடர்புடையவரை நீதிபதி உத்தரவு இல்லாமல் வெளியூருக்கு கொண்டு செல்லக்கூடாது என்று கூறிய வனத்துறையினர் நீண்ட நேரத்திற்குப் பின் அனுப்பி வைத்ததாகவும் கூறப்படுகிறது.