சேலம் நவ 13,
பாமக சின்னத்தையும், ஏ,பி படிவத்தையும் அன்புமணி உரிமை கொண்டாடுவது ராமதாஸ் உழைப்பை திருடுவதற்கு சமமானது என சேலம் மேற்கு தொகுதி எம்எல்ஏ இரா.அருள் கூறினார்.
சேலம் சூரமங்கலம் பகுதியில் உள்ள கட்சி அலுவலகத்தில் வியாழக்கிழமை எம்எல்ஏ இரா.அருள் செய்தியாளர்களை சந்தித்தார். அப்போது அவர் கூறுகையில், கட்சி தொடங்கப்பட்டதில் இருந்து ராமதாஸ் தலைமையில் ஒவ்வொரு தேர்தலையும் எதிர்கொண்டோம். 2006 வரையில் பாமகவில் யார் தலையீடும் இல்லாத காரணத்தால் பலர் சட்டமன்ற உறுப்பினர்களாகவும், நாடாளுமன்ற உறுப்பினர்களாகவும் தேர்த்தெடுக்கப்பட்டனர். பாமக தொடங்கிய காலத்திலிருந்து இதுவரை 55 சட்டமன்ற உறுப்பினர்கள், 17 நாடாளுமன்ற உறுப்பினர்கள், 5 அமைச்சர் பதவிகள் பெற்றதற்கு காரணம் ராமதாஸ் தான்; இதற்கு யாரும் உரிமை கொண்டாட முடியாது.
அன்புமணி தலைமையில் போட்டியிட்ட போது தான் அங்கீகாரத்தை இழந்தோம். பாமக அன்புமணியிடம் சென்ற பின்னர், படுதோல்வியை சந்தித்தது.
இந்நிலையில், பாமகவின் மாம்பழ சின்னத்தையும், ஏ,பி படிவத்தை கையொப்பமிடும் உரிமையும் தனக்கு தான் இருப்பதாக அன்புமணி கூறுகிறார். சின்னத்தையும், ஏ.பி. படிவத்தையும் அன்புமணி உரிமை கொண்டாடுவது ராமதாஸ் உழைப்பை திருடுவதற்கு சமமானது. மகன் என்பதால் ராமதாஸின் உழைப்பை அன்புமணி திருடுவதை ஏற்றுக்கொள்ள முடியாது. அன்புமணி குறிப்பிடும் தீயசக்தி, கைக்கூலிகள் யார் என்றால், வழக்குரைஞர் பாலு போன்ற நபர்கள் தான். இவர்கள் விலகினால் பாமகவில் நிலவும் பிரச்னைகள் தீர்ந்துவிடும். என்னை பதவி விலக சொல்ல வழக்குரைஞர் பாலுக்கு எந்த தகுதியும் இல்லை என்றார்.
வாழப்பாடி அருகே துக்க காரியத்திற்கு சென்ற போது என்ன நடந்தது என்பது காவல்துறையினருக்கு நன்றாக தெரியும். நடந்த பிரச்னைகளை வீடியோ ஆதாரங்களுடன் புகார் அளித்துள்ளோம். உண்மையான குற்றவாளி சென்னையில் முக்கிய பிரமுகர் தனது வீட்டில் பதுக்கி வைத்துள்ளார். அவர்கள் மீது காவல்துறை இதுவரை நடவடிக்கை எடுக்காதது ஏன் என எம்எல்ஏ அருள் கேள்வி எழுப்பினார்.
தொடர்ந்து, பாமக தேர்தல் குழுச் செயலாளர் சதாசிவம் கூறுகையில், போலியாக ஒரு தீர்மானத்தை நிறைவேற்றி, அதில் கையொப்பமிட்டு தேர்தல் ஆணையத்திடம் அன்புமணி வழங்கி உள்ளார். பாமகவை அன்புமணி திருடுவதற்கு தேர்தல் ஆணையம் துணை போயிருக்கிறது.
அங்கீகரிக்கப்படாத கட்சிகளின் உட்கட்சி விவகாரங்களில் தலையிட தேர்தல் ஆணையத்துக்கு உரிமையில்லை. அன்புமணி கொடுத்திருப்பது போலியான ஆவணங்கள் என தேர்தல் ஆணையத்திடம் நிரூபித்துள்ளோம் இதில் தேர்தல் ஆணையம் உரிய நடவடிக்கை எடுக்காவிட்டால் சட்ட ரீதியாக எதிர்கொள்வோம் என்றார்.