காஞ்சிபுரம் நவ 21,
நகைக்காக தாயையும் மகளையும் கொலை செய்த மூன்று பேருக்கு தலா 6 ஆயுள் தண்டனை, தலா 80ஆயிரம் ரூபாய் அபராதம் விதிப்பு காஞ்சிபுரம் முதன்மை நீதிமன்றம் பரபரப்பு தீர்ப்பு.
_________
காஞ்சிபுரம் மாவட்டம் குன்றத்தூர் இரண்டாம் கட்டளை பகுதியில் வசித்து வருபவர் ராமசாமி (வயது 32). இவர் ஓமன் நாட்டில் பணி செய்து வருகிறார். இவரது மனைவி தேன்மொழி ஆசிரியராக பணியாற்றி வருகிறார். கணவர் வெளிநாட்டில் இருப்பதால் தேன்மொழி தனது இரு பெண் குழந்தைகளான சுரவிஸ்ரீ (6) குண ஸ்ரீ என்ற ஆறு மாத கைக்குழந்தை மற்றும் தாயாருடன் தனியாக வசித்து வந்தார்.
இவரது வீட்டில் சத்யா என்ற பெண் வேலை செய்து வந்தார். தேன்மொழி ஆசிரியராக பணிக்கு சென்று விட்ட பிறகு வீட்டில் வேலை செய்த சத்யா , அதே பகுதியை சேர்ந்த ஜெயக்குமார் மற்றும் தவுலத் பேகம் ஆகிய மூவரும் சேர்ந்து தேன்மொழியின் தாயார் வசந்தாவை கழுத்தை அறுத்துக் கொலை செய்து விட்டனர்.பின்னர் ஆசிரியர் தேன் மொழியையும் வீட்டுக்கு வரச் சொல்லி அவரையும் கொலை செய்துவிட்டு அவர்களிடம் இருந்த 16 பவுன் நகையை எடுத்துக் கொண்டனர்.
இந்த சம்பவத்தை பார்த்த 6வயது பெண் குழந்தையான சுரவி ஸ்ரீ யையும் கழுத்தை அறுத்து போட்டுவிட்டு நகை 16 பவுன் நகை மற்றும் விலை உயர்ந்த பொருட்களை எடுத்துக் கொண்டு தலைமறைவாகி விட்டனர் .ஆறு வயது குழந்தை சுரவி ஸ்ரீ மயக்கம் தெளிந்து எதிர் வீட்டில் உள்ள கன்னியப்பன் என்பவரிடம் தெரிவித்துள்ளது.கன்னியப்பன் கொடுத்த புகாரின் பேரில் குன்றத்தூர் போலீசார் வழக்கு பதிவு செய்து வீட்டில் வேலை செய்த சத்யா, ஜெயக்குமார், தவுலத் பேகம் ஆகிய மூவரையும் கைது செய்தனர் .
இந்த வழக்கு காஞ்சிபுரம் மாவட்ட முதன்மை நீதிமன்றத்தில் நடந்து வந்தது.இவ் வழக்கில் அரசு வழக்கறிஞர் சசிரேகா 39 சாட்சிகளிடம் விசாரணை நடத்தினார். வழக்கினை விசாரித்து வந்த மாவட்ட முதன்மை நீதிபதி தீப்தி அறிவுநிதி மூவரும் குற்றவாளிகள் என உறுதிப்படுத்தினார்.
இதன் பின்னர் வழங்கிய தீர்ப்பில் குற்றவாளிகள் மூவருக்கும் தலா 6 ஆயுள் தண்டனையும் ஏககாலத்தில் அனுபவிக்க வேண்டும்,தலா ரூ. 80,000 அபராதமும் விதித்து தீர்ப்பளித்தார்.மேலும் இவ்வழக்கில் பாதிக்கப்பட்ட குழந்தைகளுக்கு, அரசு உதவி நிதி வழங்க வேண்டும் எனவும் இவ்வழக்கில் நீதிபதி உத்தரவிட்டார்.
