சென்னை, நவ.22
விஜய் அடுத்த கட்டமாக சேலத்தில் 4 ஆம் தேதி பொதுக் கூட்டம் நடத்த அனுமதி கேட்கப்பட்டது. இதற்கு போலீசார் அனுமதி மறுத்து விட்டனர். இன்னொரு தேதி கேட்டு மனு செய்யுமாறு, கேட்டுக் கொண்டனர். ஆகவே, டிசம்பர் 2 ஆவது வாரத்திற்கு பிறகு பிரசாரத்தை தொடங்க விஜய் திட்டமிட்டுள்ளார். கரூர் சம்பவம் தந்த பாடம் எதிரொலியாக இனி சனி, ஞாயிறு பிரசாரம் கிடையாது. அதற்கு பதிலாக வாரத்தில் மற்ற 2 நாள்கள் வீதம் பிரசாரம் செய்ய திட்டமிட்டுள்ளார்.
தமிழகத்தில் அடுத்த ஆண்டு மே மாதம் சட்டசபை தேர்தல் நடைபெறும். இதை எதிர்கொள்ள முக்கிய கட்சிகள் ஏற்கனவே, பணிகளை தொடங்கிவிட்டன.
தி.மு.க. சார்பில் ஓரணியில் தமிழ்நாடு என்ற பெயரில் வாக்களர்களை சந்திக்கும் நிகழ்ச்சி தொடங்கப்பட்டது. அ.தி.மு.க. பொதுச் செயலாளர் எடப்பாடி பழனிசாமி ஒரு முறை தமிழகம் முழுவதும் வலம் வந்துவிட்டார்.
பா.ம.க. தலைவர் அன்புமணி, தே.மு.தி.க. பொதுச் செயலாளர் பிரேமலதா ஆகியோரும் பிரசாரத்தைத் தொடங்கினார்கள்.
இதையடுத்து, தமிழக வெற்றிக் கழகத் தலைவர் விஜயும் பிரசாரத்தை வெளியிட்டார். அதன்படி, வார இறுதி நாள்களான சனி மற்றும் ஞாயிற்றுக் கிழமைகளில் பிரசாரம் செய்யப்படும் என முதலில் அறிவிக்கப்பட்டது.
பின்னர், சனிக் கிழமை மட்டும பிரசாரம் மேற்கொள்வார் என அறிவிக்கப்பட்டது. அதன்படி, திருச்சியில் இருந்து பிரசாரத்தைத் தொடங்கினார்.
3 ஆவது சனிக் கிழமையாக நாமக்கல் மற்றும் கரூர் ஆகிய ஊர்களில் பிரசாரம் செய்தார். கரூரில் பிரசாரம் செய்தபோது, நெரிசல் ஏற்பட்டது. இதில் 41 பேர் பலியானார்கள். 110 பேர் காயம் அடைந்தனர்.
இந்த சம்பவத்திற்கு பிறகு, விஜயின் பிரசாரம் கைவிடப்பட்டது. கட்சியின் செயல்பாடு அடியோடு முடங்கிப் போனது. சரியாக 1 மாதம் களித்த பிறகே, விஜயும் அவரது கட்சியினரும் அரசியல் செயல்பாடுகளில் இறங்கினார்கள்.
கரூர் சம்பவத்தில் பாதிக்கப்பட்டவர்களின் குடும்பங்களை மாமல்லபுரம் நட்சத்திர ஓட்டலுக்கு அழைத்து, உதவி வழங்கினார். அதன்பிறகு, நவம்பர் 5 ஆம் தேதி சிறப்புப் பொதுக் குழுவை கூட்டினார்.
அதில், விஜய் தலைமையில் தான் கூட்டணி என்றும், முதல்வர் வேட்பாளர் என்றும் அறிவிக்கப்பட்டது. சமீபத்தில் வாக்காளர் சிறப்புத் திருத்ததிற்கு எதிராக த.வெ.க. சார்பில் ஆர்ப்பாட்டம் நடத்தப்பட்டது.
இப்படிப்பட்ட நிலையில் விஜய் மீண்டும் நேரடி பிரசாரக் களத்தில் இறங்க தீர்மானித்துள்ளார். அதன்படி, சேலத்தில் டிசம்பர் 4 ஆம் தேதி பொதுக் கூட்டம் நடத்த திட்டமிடப்பட்டது.
இதற்காக அனுமதி கேட்டு சேலம் மாநகர காவல் ஆணையர் அலுவலகத்தில் மனு அளிக்கப்பட்டது. அதில், சேலத்தில் 3 இடங்கள் சுட்டிக் காட்டப்பட்டன. அதாவது, சீலநாயக்கன்பட்டி, போஸ் மைதானம், கோட்டை மைதானம் ஆகிய மூன்றில் ஏதாவது ஓர் இடத்தை அனுமதிக்குமாறு கேட்டுக் கொள்ளப்பட்டது.
ஆனால், டிசம்பர் 4 ஆம் தேதி கூட்டம் நடத்த அனுமதிக்க முடியாது என போலீசார் தெரிவித்துள்ளனர். இதற்கு காரணங்களையும் குறிப்பிட்டுள்ளார்கள்.
அதாவது, கார்த்திகை தீப திருநாள் டிசம்பர் 3 ஆம் தேதி வருவதால், அதற்கு மறுநாளிலேயே உரிய பாதுகாப்பு வழங்க முடியாது. மேலும், டிசம்பர் 6ஆம் தேதி பாபர் மசூதி இடிப்பு நாளாகும். அன்றைய தினத்திலும் ஒட்டுமொத்த பாதுகாப்பு தேவை.
ஆகவே, டிசம்பர் 6 ஆம் தேதிக்குப் பிறகு பொதுக் கூட்டத்தை நடத்தலாம் என போலீசார் அறிவுரை வழங்கி உள்ளனர். அது மட்டுமல்லாது, த.வெ.க. தரப்பில் எத்தனை பேர் கூட்டத்திற்கு வருவார்கள் என்ற தகவலும் குறிப்பிடப்பட வேண்டும் என்றும், கூட்டம் நடப்பதற்கு ஒரு மாதத்திற்கு முன்னரே விண்ணப்பம் செய்ய வேண்டும் என்றும் போலீசார் அறிவுரை வழங்கி உள்ளார்கள்.
இது போன்ற காரணங்களை முன்வைத்து டிசம்பர் 4 கூட்டத்திற்கு அனுமதி வழங்கப்பட வில்லை. எனவே, விஜய் தரப்பில் புதிய மனு வழங்கப்பட உள்ளது.
டிசம்பர் 2 ஆவது அல்லது 3 ஆவது வாரத்தில் விஜய் பிரசாரத்தைத் தொடங்குவார் என தெரியவந்துள்ளது. இந்த நிலையில், டிசம்பர் 10 ஆம் தேதி கூட்டம் நடத்த விஜய் விருப்பம் தெரிவித்துள்ளார். அந்த கூட்டம் சீலநாயக்கன்பட்டியில் நடத்த விருப்பம் தெரிவிக்கப்பட்டுள்ளது.
அதன்பிறகு, வாரம் தோறும் விஜய் பிரசார பயண திட்டத்தை வகுக்க உள்ளார். இனி ரோடு ஷோ இருக்காது. பொதுக் கூட்டம் மட்டுமே நடத்தப்படும்.
இந்தக் கூட்டங்களும் விடுமுறை நாள்களான சனி, ஞாயிற்றுக்கிழமைகளில் இருக்காது. அதற்கு பதிலாக திங்கள் முதல் வெள்ளி வரையில் ஏதாவது 2 நாள்கள் பிரசாரம் செய்ய உள்ளார்.