ராணிப்பேட்டை அக் 30,
ராணிப்பேட்டையில் தமிழ்நாடு கிராம வங்கியில் அடகு வைத்த தங்க நகையை மீட்ட கட்டிய பணத்தில் 10,000 ரூபாய் கள்ள நோட்டுகள் இருந்ததால் அதிர்ச்சி அடைந்த வங்கி ஊழியர்கள். காவல் துறையினருக்கு தகவல் கொடுத்ததன் அடிப்படையில் கள்ளப் பணத்தை கொடுத்த 6 பேரை ராணிப்பேட்டை காவல் துறையினர் கைது செய்தனர்.
யுடியூப் பார்த்த கள்ள நோட்டுகள் தயாரித்தது விசாரணையில் அம்பலம்.
ராணிப்பேட்டை நவல்பூர் பகுதியில் செயல்பட்டு வரும் தமிழ்நாடு கிராம வங்கியில் அடகு வைத்த நகையை மீட்க வந்த நபர்கள் வழங்கிய பணத்தில் கள்ளப்பணம் இருப்பது தொடர்பாக வங்கி மேலாளர் அளித்த புகாரின் பேரில் காவல்துறையினர் 6 பேரை கைது செய்த சம்பவம் அப்பகுதியில் பரபரப்பை ஏற்படுத்தி உள்ளது.
வாலாஜாபேட்டை கடப்பரங்கையன் தெருவை சேர்ந்தவர் முத்துராமன்(41). இவரது மனைவி கோசலை(38). கோசலையின் 5 சவரன் தங்க நகையை கடந்த மே மாதம், முத்துராமன் அடகு வைத்து 2,23,000 ரூபாய் பணத்தை பெற்று சென்றுள்ளார்.
இந்த நிலையில் முத்துராமன் தான் வைத்திருந்த லாரியை தனக்கு தெரிந்தவரான ராமு(55) என்பவரிடம் சொல்லி விற்பதற்கு ஏற்பாடு செய்துள்ளார். லாரியை வாங்குவதற்காக வாலாஜாபேட்டையை சேர்ந்த அஸ்கர் பாஷா(49), கீழ்புதுப்பேட்டை அன்னை காளிகாம்பாள் நகரைச் சேர்ந்த சர்தார்(48), மற்றும் மேல்விஷாரத்தைச் சேர்ந்த வசீம்(42), இப்ராஹிம், வாலாஜாபேட்டை சேர்ந்த சிவா(42) ஆகியோர் இணைந்து லாரியை பணம் கொடுத்து வாங்கியுள்ளனர்.
லாரி விற்ற பணத்தில் வங்கியில் அடகு வைக்கப்பட்ட தங்க நகையை மீட்பதற்கு 2,35000 ரூபாய் பணத்தை முத்துராமன் வங்கியில் செலுத்தியுள்ளார். வங்கி காசாளர் அந்த பணத்தை இயந்திரம் மூலம் எண்ணும் போது அதில் 10,000 ரூபாய் கள்ள நோட்டுகள் இருப்பது தெரியவந்தது.
அதை தொடர்ந்து வங்கி மேலாளர் ராஜராஜன் ராணிப்பேட்டை காவல் நிலையத்தில் புகார் அளித்தார். புகார் அடிப்படையில் முத்துராமன் மற்றும் கோசலை ஆகியோரை பிடித்து விசாரணை மேற்கொண்டதில் லாரி விற்ற பணத்தை வங்கியில் செலுத்தியது தெரியவந்தது. இதனை தொடர்ந்து அவர்கள் கொடுத்த வாக்கு மூலத்தின் அடிப்படையில் லாரியை வாங்கிய ராமு, அஸ்கர், சர்தார், வசீம், சிவா, இப்ராஹிம், ஆகிய 6 பேரை பிடித்து காவல்துறையினர் விசாரணை நடத்தினர். மேலும் அவர்களது இல்லத்தில் நடத்திய சோதனையில் கள்ள நோட்டு அடித்த மெஷின், தயாரித்த கணினி ஆகியவற்றை வைத்திருந்தது உறுதியானது. மேலும் யுடியூப் பார்த்து கள்ள நோட்டுகளை இப்ராஹிம் தயாரித்ததும் விசாரணையில் அம்பலமான நிலையில் 6 பேரையும் கைது செய்து சிறையிலடைத்தனர்.