கோவையில் நடைபெற்ற சாலை பாதுகாப்பு விழிப்புணர்வு இருசக்கர வாகன பேரணியில் அதிக ஒலி எழுப்பும் இருசக்கர வாகனங்களுடன் வந்த 20 இருசக்கர வாகனங்களை அதே பகுதியில் வைத்து காவல்துறையினர் பறிமுதல் செய்த சம்பவம் பரபரப்பை ஏற்படுத்தியது.
கோவையின் பெருமையை பறைசாற்றும் வகையில் ஆண்டுதோறும் கோவை விழா வெகு விமரிசையாக கொண்டாடப்பட்டு வருகிறது. கோவையில் உள்ள கல்வி நிறுவனங்கள், தொழில் அமைப்புகள், மருத்துவமனை நிர்வாகங்கள், காவல்துறை, மாவட்ட நிர்வாகம் என அனைத்து தரப்பினரும் இணைந்து இந்த கோவை விழாவை நடத்தி வரும் நிலையில் 18 வது கோவை விழா நேற்று முன்தினம் துவங்கி வருகிற 25ஆம் தேதி வரை நடைபெறுகிறது.இந்த ஆண்டு கோவை விழாவையொட்டி 150-க்கும் மேற்பட்ட நிகழ்ச்சிகள் நடத்த திட்டமிடப்பட்டு தற்போது வரை பல்வேறு நிகழ்ச்சிகள் நடத்தப்பட்டு வரும் சூழலில் சாலை விபத்துகளை தவிர்க்கும் வகையில் சாலை பாதுகாப்பை வலியுறுத்தி 500க்கும் மேற்பட்ட இருசக்கர வாகனங்கள் பங்கேற்கும் இருசக்கர வாகன பேரணி இன்று காலை நடைபெற்றது. பேரணியில் பங்கேற்பதற்காக காலை முதல் கோவை காவலர் பயிற்சி பள்ளி வளாகத்திற்கு இரு சக்கர வாகனங்கள் அணிவகுத்து வந்த நிலையில் அதனை ஓட்டி வந்தவர்களும் முறையாக தலைக்கவசம் அணிந்து தங்கள் இருசக்கர வாகனங்களை ஓட்டி வந்தனர். இதனிடையே இருபதுக்கும் மேற்பட்ட இருசக்கர வாகனங்கள் அந்த வளாகத்திற்குள் வரும் பொழுதே அதிக ஒலி எழுப்பும் வகையிலான சைலன்சர்களை பொருத்தி வரவே மேடையில் நின்று கூட்டத்தை ஒழுங்கு படுத்திக் கொண்டிருந்த மாநகர காவல் துறை போக்குவரத்து பிரிவு துணை ஆணையர் அசோக்குமார் விதிகளுக்கு மாறாக அதிக ஒலி எழுப்பியபடி வந்த 20-க்கும் மேற்பட்ட இருசக்கர வாகனங்களை அங்கேயே பறிமுதல் செய்யுமாறு போக்குவரத்து பிரிவு போலீசாருக்கு உத்தரவிட்டார்.
இதையடுத்து அந்த வாகனங்களை பறிமுதல் செய்த போலீசார் வாகன ஓட்டிகளுக்கு அபராதம் விதித்தனர். தொடர்ந்து இருசக்கர வாகன பேரணியானது துவங்கி நடைபெற்ற நிலையில் மாநகரின் முக்கிய சாலைகள் வழியே விழிப்புணர்வு ஏற்படுத்திய படி பேரணியானது நடத்தப்பட்டது. பின்னர் பேரணி முடிவில் பறிமுதல் செய்யப்பட்ட இருசக்கர வாகன ஓட்டிகளுக்கு போக்குவரத்து விதிகளுக்கு உட்பட்டு வாகனங்களை இயக்குமாறு அறிவுறுத்திய போலீசார் அவர்களை எச்சரித்து அனுப்பி வைத்தனர்…….