தேனி நவ 15,
தேனி மாவட்டம் சின்னமனூர் பகுதியில் உள்ள அரசு உதவி பெறும் தனியார் பள்ளியில் ஆசிரியராக பணிபுரிந்து வருபவர் 40 வயதான மாரிச்செல்வம். இவர் கடந்த சில வருடங்களுக்கு முன் ஆசிரியர் பயிற்சி பள்ளியில் பணிபுரிந்த போது, உடன் பணிபுரிந்த பெண் ஆசிரியை ஒருவருடன் நட்பாக பழகி உள்ளார்.
ஏற்கனவே திருமணமாகியிருந்த அப்பெண் ஆசிரியை உடனான பழக்கத்தை தவறாக பயன்படுத்திக் கொண்ட ஆசிரியர் மாரிச்செல்வம், அவருக்கு பாலியல் தொந்தரவு செய்ததாக கூறப்படுகிறது.
தொடர்ந்து, செல்போன் மற்றும் நேரில் அவரது வீட்டிற்கும் சென்ற ஆசிரியர் மாரிச்செல்வம் பாலியல் ரீதியான தொந்தரவுகள் செய்ததாக கூறப்படுகிறது.
அதுமட்டுமன்றி ஆசிரியை குறித்து நாளிதழ் ஒன்றில் அவதூறு செய்தியும் ஆசிரியர் மாரிச்செல்வம் தூண்டுதலில் வெளியிட்டதால், தான் தற்கொலைக்கு முயன்றதாகவும் எனவே சம்பந்தப்பட்ட நபர்கள் மீது நடவடிக்கை எடுக்கக் கோரி
பாதிக்கப்பட்ட ஆசிரியை அக்டோபர் 10 அன்று தேனி மாவட்ட காவல் கண்காணிப்பாளர் அலுவலகத்தில் புகார் அளித்தார்.
அதனடிப்படையில் விசாரணை நடத்திய சின்னமனூர் போலீசார், நவம்பர் 3 அன்று ஆசிரியர் மாரிச்செல்வம், நாளிதழின் உத்தமபாளையம் தாலுகா நிருபர் மீதும் வழக்குப் பதிவு செய்தனர்.
இந்நிலையில், இது தொடர்பாக இன்று ஆசிரியர் மாரிச்செல்வத்தை கைது செய்த சின்னமனூர் போலீசார் அவரை நீதிமன்ற காவலுக்கு உட்படுத்தினர்.