கோவையில் கல்லூரி மாணவிக்கு நிகழ்ந்துள்ளது கொடூர செயல் எனவும், இந்த வழக்கில் காவல்துறை சிறப்பாக செயல்பட்டிருப்பதால் கட்டாயம் நீதி வழங்கப்படும் எனவும், தமிழ்நாடு மகளிர் ஆணைய தலைவர் குமாரி தெரிவித்துள்ளார்.
கோவையில் கல்லூரி மாணவி கூட்டு பாலியல் வன்கொடுமைக்கு உள்ளாக்கப்பட்ட சம்பவம் தொடர்பாக போலீசார் விசாரணை மேற்கொண்டு 3 பேரை கைது செய்துள்ளனர். இந்நிலையில், இந்த சம்பவம் தொடர்பாக தமிழ்நாடு மகளிர் ஆணையமும் விசாரணை நடத்தி வருகின்றது. இதன் ஒரு பகுதியாக ஆணையத்தின் தலைவர் திருமதி.குமாரி இன்று கோவை வருகை தந்து பாதிக்கப்பட்ட மாணவியை மருத்துவமனையில் நேரில் சந்தித்து ஆறுதல் கூறினார். தொடர்ந்து அவருக்கு வழங்கப்படும் சிகிச்சைகள் குறித்து மருத்துவர்களிடம் கேட்டறிந்தார். இதன்பின்னர் கோவை அரசு மருத்துவமனையில் அனுமதிக்கப்பட்டுள்ள மாணவியின் நண்பரை சந்திப்பதற்கு ஆணைய தலைவர் குமாரி வருகை தந்தார். அப்போது செய்தியாளர்களிடம் பேசிய அவர், “பாதிக்கப்பட்ட மாணவியை சந்தித்து அவரின் நிலை மற்றும் தேவைகளை கேட்டறிந்தேன். இவ்வழக்கில் 3 பேரை போலீசார் கைது செய்துள்ளனர். பாதிக்கப்பட்ட மாணவியின் நண்பரை பார்க்க உள்ளேன். பாதிக்கப்பட்ட பெண்ணிற்கு மருத்துவ சிகிச்சை, மனநல ஆலோசனை தேவை. அவருக்கு கவுன்சிலிங் தர வேண்டும். குற்றவாளிகளுக்கு கடுமையான தண்டனை வழங்க வேண்டும். இது ஒரு கொடூர செயல். முதலமைச்சர் ஒரு மாதத்தில் குற்றப்பத்திரிகை தாக்கல் செய்ய உத்தரவிட்டுள்ளார். சமீப காலமாக பெண்களுக்கு எதிரான வழக்குகளில் விரைவான மட்டும் கடுமையான தண்டனைகள் வழங்கப்படுகிறது. கோவையில் கல்லூரி மாணவி கூட்டு பாலியல் பலாத்காரம் செய்யப்பட்ட இடத்தை நேரில் சென்று பார்வையிட உள்ளோம். பெண்களுக்கு எதிரான குற்றங்களில் விழிப்புணர்வு அதிகரித்திருப்பதால், பாதிக்கப்பட்டவர்கள் தைரியமாக வெளியில் வந்து புகார் அளிக்கின்றனர். 2002ல் இருந்து பெண்கள் ஆணையம், சமூக நலத்துறை ஆகியவை விழிப்புணர்வை ஏற்படுத்தி வருகிறோம். தைரியமாக பெண்கள் வெளியில் சொல்வதால் புகார்களின் எண்ணிக்கை அதிகரித்து வருகின்றது. மகளிர் ஆணையத்திற்கு முன்பு புகார்கள் வராது. இங்கு வந்தால் தீர்வு கிடைக்கும் என்ற நம்பிக்கை ஏற்படுவதால், அதிக புகார்கள் வருகிறது. 30, 40 சதவீதம் வரை புகார்கள் அதிகரித்துள்ளது. குற்றங்களுக்கான தண்டனை அதிகரித்தால் குற்றங்கள் குறையும். கோவை சம்பவம் போன்ற நிகழ்வுகள் குறித்து அதிகம் பேசப்படக்கூடாது. திரும்ப திரும்ப அதை பேசுவதால், பாதிக்கப்பட்ட பெண்கள் கடும் மன உளைச்சலுக்கும், சமூக சிக்கலுக்கும் உள்ளாகின்றனர். கைது நடவடிக்கைக்கு பிறகு நீதித்துறை விசாரணைக்கு சென்றுவிடும் என்பதால் கட்டாயம் நீதி வழங்கப்படும். இவ்வழக்கில் போலீசார் நன்றாக வேலை செய்துள்ளார்கள். மாதம்பட்டி ரங்கராஜ் வழக்கில் டிஜிபிக்கு டைரக்க்ஷன் பாஸ் பண்ணியுள்ளேன்.” என்றார்.