வாணியம்பாடி, நவ்.24-
திருப்பத்தூர் மாவட்டம் வாணியம்பாடி அடுத்த புல்லூர் தடுப்பணை பகுதியில் உள்ள கனகநாச்சியம்மன் கோவிலில் ஆந்திர மாநில முதல்வர் சந்திரபாபு நாயுடுவின் மனைவி புவனேஷ்வரி சாமி தரிசனம் செய்தார். அதனை தொடர்ந்து பாலாறு தடுப்பணையில் படகு சவாரி செய்தார்.
சாமி தரிசனம் செய்ய வந்த மக்களிடம் தமிழில் பேசியவர் கணவன் மனைவி உறவில் சுமுகமாக இருக்க வேண்டும். அதில் மனைவியை கணவன் அடிக்க கூடாது என பேசினார். இந்த எதார்த்த பேச்சை கேட்டவுடன் கூட்டத்தில் சிரிப்பலை ஏற்பட்டது.தொடர்ந்து பேசிய அவர் முதல் அமைச்சர் சொந்த தொகுதிக்கு கூட வராத அளவிற்கு மக்களுக்காக உழைத்து வருகிறார். நமது மாநிலத்தின் வளர்ச்சியை கருத்தி கொண்டு வெளிநாட்டு முதலீடுகளை ஈர்த்து வருகின்றார். முதல்வர் பணி சுமை காரணமாக இத்திருவிழாவில் பங்கேற்க முடியவில்லை ஆகவே அவர் சார்பாக நான் வந்துள்ளேன். மேலும் இந்த கனகநாச்சியம்மன் ஆலயம் 3.5 கோடியில் புனரமைக்கப்பட்டு இந்த கோவில் சுற்றுலா தலமாக மாற்றப்படும், பொதுமக்களின் வசதிக்காக பாலாற்றின் குறுக்கே பாலம் அமைக்க ஏற்பாடுகள் செய்ய முதல்வரிடம் தெரிவிப்பதாக கூறினார்.நிகழ்ச்சியில் வாணியம்பாடி சட்டமன்ற உறுப்பினர் செந்தில்குமார்
ஆந்திர முதல்வர் சந்திரபாபு நாயுடு மனைவியை வரவேற்றார். இதனை தொடர்ந்து அவரிடம் கிருஷ்ணா நதி 750 கிலோமீட்டர் தூரம் ஆந்திராவிற்கு அந்திரி நிவாஸ் திட்டத்தின் கீழ் நீர் கொண்டு வந்துள்ள நிலையில், அதனை புல்லூர் வரை கொண்டு வந்து பாலாற்றில் இணைத்து தமிழக மக்கள் பயன்பெறும் வகையில் செய்து தர கோரிக்கை வைத்தார். அதற்கு புவனேஸ்வரி பதில் அளித்து கூறியதாவது அந்த திட்டத்திற்கு மின்சாரம் பற்றாக்குறை உள்ளதாகவும், அதற்கு மின்சாரம் வழங்க தமிழக அரசு முன் வந்தால், தமிழக மக்களுக்கும் கிருஷ்ணா நதி நீர் வழங்க நாங்களும் தாயராக உள்ளோம் என தெரிவித்தார்.