கள்ளக்குறிச்சி நவ18,
கள்ளக்குறிச்சி மாவட்டம்
சங்கராபுரம் அருகே பூட்டை கிராமத்தில் தாய்,தந்தையை இழந்து தவிக்கும் 4 குழந்தைகளுக்கும் கவலைப்படாதீர்கள் நான் உங்களுக்கு தாயாக இருக்கின்றேன் என்று தமிழ்நாடு முதலமைச்சர் ஆறுதல் கூறினார்
கள்ளக்குறிச்சி மாவட்டம் சங்கராபுரம் அருகேயுள்ள பூட்டை கிராமத்தை சேர்ந்த கமலக்கண்ணன் – வசந்தி தம்பதியினருக்கு லாவண்யா,ரீனா,ரீஷிகா என்ற மூன்று பெண் பிள்ளைகளும் அபினேஷ் என்ற ஒரு ஆண் பிள்ளையும் உள்ளனர். கமலக்கண்ணன் மற்றும் வசந்தா இருவரும் கூலி வேலைக்குச் சென்று தனது பிள்ளைகளை படிக்க வைத்து வந்த நிலையில், கடந்த 7 வருடங்களுக்கு முன்னர் வசந்தா உடல் நலக்குறைவு ஏற்பட்டு உயிரிழந்தார். கமலக்கண்ணன் கூலி வேலைக்குச் சென்று தனது பிள்ளைகளை படிக்க வைத்து வந்த நிலையில் நான்கு பிள்ளைகளையும் படிக்க வைக்க வேண்டும் மற்றும் குடும்பத்தையும் பார்த்துக் கொள்ள வேண்டும் என்பதால் கமலக்கண்ணனின் வருமானம் குடும்பத்திற்கு போதுமானதாக இல்லாததால் கமலக்கண்ணனின் மூத்த மகள் லாவண்யா கல்லூரி கட்டணம் செலுத்த முடியாததால் தனது தந்தைக்கு துணையாக கோயம்புத்தூரில் உள்ள தனியார் நிறுவனத்தில் வேலை செய்து தனது சகோதர, சகோதரிகளை படிக்க வைத்து வந்துள்ளார்.
இந்த நிலையில் கடந்த ஓராண்டுக்கு முன்னர் கமலக்கண்ணன் கல்லீரல் பிரச்சனை காரணமாக பாதிக்கப்பட்டு மருத்துவமனையில் தொடர்ந்து சிகிச்சை பெற்று வந்தார் . இந்த நிலையில், குடும்பத்தின் வறுமை காரணமாக 8-ம் வகுப்பு படித்து வந்த ரீனா மற்றும் 10-ம் வகுப்பு படித்து வந்த ரீஷிகா ஆகியோரும் பள்ளி படிப்பை பாதியில் நிறுத்திவிட்டனர். கமலக்கண்ணனின் மகன் அபினேஷ் அதே பகுதியில் உள்ள அரசு உதவி பெறும் பகுதியில் எட்டாம் வகுப்பு படித்து வருகின்றார். கல்லீரல் பிரச்சனை காரணமாக கடந்த இரண்டு நாட்களுக்கு முன்னர் சிகிச்சை பலனின்றி கமலக்கண்ணன் பரிதாபமாக உயிரிழந்தார். இந்த நிலையில் பூட்டை கிராமத்தில் உள்ள அவரது இல்லத்தில் அஞ்சலிக்காக வைக்கப்பட்ட கமலக்கண்ணன் உடலுக்கு பலரும் அஞ்சலி செலுத்தி வந்த நிலையில், இறந்த கமலக்கண்ணன் உடலை அடக்கம் செய்ய பணம் இல்லாமல் குழந்தைகள் நான்கு பேரும் தவித்தனர்..
இந்நிலையில் அந்த பகுதியைச் சேர்ந்த கிராம மக்கள் ஒன்று கூடி வீடு வீடாக சென்று பணம் வசூல் செய்து இறந்த கமலக்கண்ணனின் உடலுக்கு இறுதி சடங்குகளை செய்து அடக்கம் செய்தனர். கடந்த ஏழு வருடங்களுக்கு முன்னர் தாயை இழந்து கடந்த இரண்டு நாட்களுக்கு முன்னர் கல்லீரல் பிரச்சனை காரணமாக தந்தையையும் இழந்து ஆதரவின்றி தவித்து வரும் தங்களுக்கு தமிழ்நாடு அரசு உதவிட வேண்டும் என்றும், பள்ளிப்படிப்பை பாதியில் நிறுத்திய தனது சகோதரிகள் மீண்டும் பள்ளிப்படிப்பை தொடர உதவிட வேண்டும் என்றும் தாய்,தந்தையை இழந்து தவிக்கும் லாவண்யா கண்ணீர் மல்க தமிழ்நாடு அரசிற்கு கோரிக்கை விடுத்தனர். இதனையறிந்த முதலமைச்சர் மு.க.ஸ்டாலின், அவர்களை போனில் தொடர்புகொண்டு பேசி ஆறுதல் கூறினார். பொதுப்பணிகள் மற்றும் நெடுஞ்சாலைகள் துறை அமைச்சர் எ.வ .வேலு நேரில் குழந்தைகளின் வீட்டிற்குச் சென்று ஆறுதல் கூறி உதவி செய்தார். குழந்தைகளுக்கு உடனடியாக தமிழ்நாடு அரசு மூலமாக வீடு கட்டும் திட்டத்தின் கீழ் புதிய வீடு கட்டித் தருவதாகவும் குழந்தைகள் படிப்பிற்கு தொடர்ந்து உதவி செய்ததாகவும் கூறினார் முன்னதாக அன்பு கரங்கள் திட்டத்தின் கீழ் ரூபாய் ஒரு லட்சம் நிதிக்கான காசோலையையும் வழங்கினார்.மேலும் அவர்களுக்கு தேவையான உதவிகள் செய்ய மாவட்ட ஆட்சியருக்கு உத்தரவு பிறப்பித்தார். தொடர்ந்து அவர்களுக்கு தேவையான உதவிகளை செய்வதாகவும் கூறினார். அப்பொழுது சட்டமன்ற உறுப்பினர்கள் உதயசூரியன், வசந்தம் கார்த்திகேயன் நாடாளுமன்ற உறுப்பினர் மலையரசன் மற்றும் மாவட்ட ஆட்சியர் பிரசாந்த் உள்ளிட்டோர் உடன் இருந்தனர்.