கமுதி, அக்.31–
ராமநாதபுரம் மாவட்டம் கமுதி அடுத்துள்ள பசும்பொன்னில் விடுதலைப் போராட்ட வீரரும், முன்னாள் மக்களவை உறுப்பினருமான பசும்பொன் உ.முத்து ராமலிங்கத்தேவர் 118–வது ஜெயந்தி விழாவும் 63–வது குருபூஜை விழா 28, 29, 30 ஆகிய தேதிகளில் நடைபெறுகிறது. 28 ஆம் தேதி காலை 7 மணிக்கு ஓதுவார்களின் மங்கல இசை, கணபதி ஹோமம், சிவாச்சாரி யர்கள் வேத மந்திரங்கள் முழங்க, லட்சார்ச்சனை பெருவிழாவுடன் குருபூஜை விழா தொடங்கியது. மேலும் காலை 11 மணிக்கு பிரசாதம் வழங்குதல், மாலை 6 மணிக்கு திருவிளக்கு பூஜை, இரவு 9 மணிக்கு தேரோட்டம் உள்ளிட்ட நிகழ்ச்சிகள் நடந்தன. 29ஆம் தேதி அரசியல் விழா நடந்தது. இன்று அரசு விழாவாகவும் நடைபெறுகிறது. விழாவிற்கு வரும் பொது மக்களுக்கு அரசியல் கட்சி மற்றும் சமுதாய அமைப்பினர் சார்பில் மிகப்பெரிய அளவில் அன்னதான கூடங்கள் அமைத்து பொதுமக்களுக்கு அன்னதானம் வழங்கினார்கள். பொதுமக்களுக்கான அடிப்படை தேவைகள், சாலை சீரமைப்பு உள்ளிட்ட பணிகளை கமுதி ஊராட்சி ஒன்றிய நிர்வாகம் செய்தது. நேற்று காலை துணை ஜனாதிபதி சி.பி.ராதாகிருஷ்ணன் தேவர் நினைவிடத்தில் மரியாதை செலுத்தினார். அவருடன் பா.ஜ.க. மாநில தலைவர் நயினார் நாகேந்திரன் மற்றும் பலர் சென்றிருந்தனர். அதன் பிறகு காலை 9.30 மணியளவில் தமிழக முதல்- அமைச்சர் மு.க. ஸ்டாலின் ,தேவர் நினைவிடத்தில் மரியாதை செலுத்தினார். அவருடன் தமிழக அமைச்சர்களும் , எம்.எல்.ஏ.க்க ளும் சென்றிருந்தனர்.
அ.தி.மு.க. பொதுச்செயலாளர் எடப்பாடி பழனிசாமி, முன்னாள் அமைச்சர்கள், பல்வேறு அரசியல் கட்சி தலைவர்கள், எம்.பி.க்கள், எம்.எல்.ஏ.க்கள், சமுதாய தலைவர்கள் மற்றும் பல்வேறு அமைப்பினர் தேவர் நினை வாலயத்தில் உள்ள அவரது நினைவிடத்தில் மரியாதை செலுத்தினார்கள். ம.தி.மு.க. பொதுச்செயலாளர் வைகோ, முன்னாள் முதலமைச்சர் ஓ.பன்னீர் செல்வம், சசிகலா, அ.ம.மு.க. பொதுச்செயலாளர் டி.டி.வி.தினகரன், பா.ம.க. தலைவர் ஜி.கே.மணி ஆகியோரும் நினைவிடத்தில் அஞ்சலி செலுத்தினார்கள்.
முன்னதாக மதுரையில் தேவர் சிலைக்கு, மருது சகோதரர் சிலைக்கு மாலை அணிவித்தனர்.
மேலும் கமுதியில் இருந்து பசும்பொன் கிராமம் வரையிலும் 4300-–க்கும் மேற்பட்ட கண்காணிப்பு கேமராக்கள் பொருத்தப்பட்டு, 2 கட்டுப்பாட்டு அறைகள் அமைக்கப்பட்டிருந்தன. தென்மண்டலஐ.ஜி.பிரேம் ஆனந்த்சின்கா தலைமையில் ஒரு டி.ஐ.ஜி., 20 சூப்பிரண்டுகள், 27 கூடுதல் சூப்பிரண்டுகள் உள்பட மாவட்டம் முழு வதும் 8 ஆயிரம் போலீசார் பாதுகாப்பு பணியில் ஈடுபடுத்தப்பட்டு உள்ளனர்.
கோரிப்பாளையம் தேவர் சிலைக்கு மரியாதை
முன்னதாக நேற்று காலை 8.30 மணிக்கு மதுரை கோரிப்பாளையத்தில் உள்ள தேவர் சிலைக்கு முதல் அமைச்சர் மு.க. ஸ்டாலின் மாலை அணிவித்து மரியாதை செலுத்தினார்.
சிலைக்கு அடியில் வைக்கப்பட்டிருந்த தேவர் படத்திற்கு மலர் தூவினார். அதன் பிறகு மாரியம்மன் கோவில் தெப்பக்குளத்தில் உள்ள மருதுபாண்டியர்கள் சிலைக்கு மு.க. .ஸ்டாலின் மாலை அணிவித்தார். பிறகு கார் மூலம் அங்கிருந்து பசும்பொன்னுக்கு புறப்பட்டு சென்றார். மதுரையில் நடந்த நிகழ்ச்சிகளில் கனிமொழி எம்.பி. , அமைச்சர்கள் தங்கம் தென்னரசு, ஐ.பெரியசாமி, மூர்த்தி, பழனிவேல் தியாகராஜன், டி.ஆர்.பி. ராஜா, முன்னாள் அமைச்சர் பொன்முத்துராமலிங்கம் மற்றும் தளபதி எம்.எல்.ஏ., மாவட்ட செயலாளர் மணிமாறன்,முன்னாள் எம்.எல்.ஏ. முத்துராமலிங்கம் உள்பட பலர் கலந்து கொண்டனர். அ.தி.மு.க. பொதுச்செயலாளர் எடப்பாடி பழனிசாமி மதுரை தெப்பக்குளத்தில் உள்ள மருது சகோதரர் சிலைகளுக்கு மாலை அணிவித்தார்.
அவருடன் முன்னாள் அமைச்சர்கள் செல்லூர் ராஜு, ஆர்.பி.உதயகுமார் மற்றும் ராஜன் செல்லப்பா எம்.எல்.ஏ. உள்ளிட்ட பலர் பங்கேற்றனர்.