புதுச்சேரி அக் 28,
புதுச்சேரியில் தரமற்ற ரயில்வே சுரங்கப்பாதையை கண்டித்து பல் துலக்கும் நூதன போராட்டத்தில் ஈடுபட்டு அரசுக்கு எதிர்ப்பு தெரிவித்த சமூக ஆர்வலர்.
புதுச்சேரி நூறடி சாலையில் உள்ள ரயில்வே மேம்பாலத்தின் கீழ் பகுதியில் சுரங்க பாதை அமைக்கப்பட்டு ஆட்டோ, இருசக்கர வாகனங்கள் சென்று வருகிறது. இந்நிலையில் கடந்த சில நாட்களுக்கு முன்னர் பெய்த கனமழையின்போது சுரங்கப்பாதையில் தண்ணீர் நிரம்பியதால் வாகனங்கள் செல்ல தடைவிதிக்கப்பட்டது. இந்நிலையில் சமூக ஆர்வலர் சுத்தம் சுந்தரராஜன் இன்று சுரங்கப்பாதையில் அமர்ந்து பல்துலக்கும் நூதன போராட்டம் நடத்தினார். அப்போது, அவர் கூறுகையில், நூறடி சாலையில் கட்டப்பட்டுள்ள மேம்பாலம் தரமற்றவையாக உள்ளது. இதனால் மழைநீர் சுவர்களில் கசிந்து சுரங்கப்பாதைக்கு வருகிறது. இந்நிலை நீடித்தால் சுவர் விரைவில் வலுவிழந்து சேதமடையும் நிலை ஏற்படும். இதனை கண்டித்தும், இன்னும் இரண்டு மேம்பாலங்கள் கட்டப்படவுள்ளதை குடியரசு தலைவர் மேற்பார்வையில் தரமாக கட்டவேண்டும் என வலியுறுத்தியும் போராட்டம் நடத்துவதாக அவர் தெரிவித்தார்.