திண்டுக்கல் நவ 3,
வேடசந்தூர் அருகே தொழிலாளிகள் பறித்த 13 மற்றும் 6 கிலோ எடையுள்ள ராட்சத காளான்களின் வீடியோவிற்கு சமூக வளைதளங்களில் லைக்ஸ்-கள் குவிந்து வருகின்றன.
திண்டுக்கல் மாவட்டம், வேடசந்தூர் அருகே உள்ள அய்யலூர் பூசாரிபட்டி பகுதியைச் சேர்ந்த மரம் வெட்டும் தொழிலாளிகளான முத்துராஜ் (வயது 37), சுரேஷ்(25) ஆகியோர் தினமும் காலை வேளையில் காட்டுப் பகுதிகளுக்குச் சென்று உணவுக் காளான் பறித்து வருவது வழக்கம்.
இன்று காலை அவர்கள் அதே பகுதியில் காளான் தேடி சென்ற போது அங்கு ராட்சத காளான் ஒன்று முளைத்திருந்ததை கண்டு ஆனந்த அதிர்ச்சடைந்தனர். அதனைத் தொடர்ந்து அந்த காளான்களை பறித்துச் சென்று எடை போட்டு பார்த்தபோது 13 கிலோ, 6 கிலோ மற்றும் 5 கிலோ எடையில் இருந்தன.
பொதுவாக உணவுக் காளான்கள் கையடக்க அளவில் சிறியதாக இருக்கும். ஆனால் பூசாரிபட்டியில் 13 கிலோ, 6 கிலோ மற்றும் 5 கிலோ எடை உள்ள ராட்சத காளான்கள் முளைத்திருந்தது அனைவரையும் ஆச்சரியப்படுத்தியது. இந்த காளான்களை அப்பகுதியைச் சேர்ந்த இளைஞர்கள் வீடியோ எடுத்து இன்ஸ்டாகிராமில் பதிவிட்டனர். அந்த வீடியோவிற்கு தற்போது லைக்ஸ்-கள் குவிந்து வருகின்றன.