குன்னூர், நவ. 10–
நீலகிரி மாவட்டத்தில் பெய்த கனமழையால் குன்னூர்–மேட்டுப்பாளையம் தேசிய நெடுஞ்சாலையில் பார்லியார் பகுதியில் நிலச்சரிவு ஏற்பட்டதைத் தொடர்ந்து, வாகனப் போக்குவரத்துக்குத் தடை விதிக்கப்பட்டுள்ளது. இதனால் குன்னூர் நகரம் போக்குவரத்து வசதிகளில் தனித் தீவாக மாறியுள்ளதுபோன்ற சூழ்நிலை ஏற்பட்
டுள்ளதாகப் பொதுமக்கள் வேதனை தெரிவிக்கின்றனர்.
கடந்த 10 நாட்களாக இந்த வழித்தடத்தில் பேருந்துகள் மற்றும் சிறிய, பெரிய வாகனங்களின் போக்குவரத்து தடை செய்யப்பட்டுள்ளதால், கோத்தகிரி வழியாக வாகனங்கள் மாற்றுப் பாதையில் இயக்கப்பட்டு வருகின்றன.
இயற்கைப் பேரிடர்களை யாராலும் தடுக்க முடியாது என்றாலும், அவற்றால் பாதிக்கப்படும் பொதுமக்களின் அன்றாட வாழ்க்கையை இயல்பு நிலைக்குக் கொண்டுவர உரிய மாற்று ஏற்பாடுகளை மேற்கொள்வது அவசியமாகும்.
குறிப்பாக, குன்னூர் நகரம் மற்றும் அதனைச் சுற்றியுள்ள பல்வேறு கிராமங்களில் வசிக்கும் பொதுமக்கள், வேலைவாய்ப்பு, மருத்துவம், கல்வி, வியாபாரம் உள்ளிட்ட அத்தியாவசியத் தேவைகளுக்காக மேட்டுப்பாளையம் மற்றும் கோவைக்குச் சென்று வருகின்றனர்.
தற்போது போதிய பேருந்து வசதிகள் இல்லாததால் பயணிகள் கடும் சிரமங்களைச் சந்தித்து வருகின்றனர்.
### கோத்தகிரியில் இறக்கிவிடப்படும் பயணிகள்!
மேட்டுப்பாளையம் மற்றும் கோவையிலிருந்து குன்னூர் நோக்கிப் பயணிக்கும் பொதுமக்களில் சிலர், நேரடிப் பேருந்து வசதி இல்லாத காரணத்தால் கோத்தகிரியில் இறக்கிவிடப்படும் நிலை இருப்பதாகக் கூறப்படுகிறது.
அங்கிருந்து மீண்டும் வேறு பேருந்துகளைப் பிடித்து குன்னூர் செல்ல வேண்டிய கட்டாயம் ஏற்பட்டுள்ளது.
மாற்றுப் பாதையில் ஒரு பேருந்து சென்று திரும்புவதற்கே சுமார் 4 முதல் 5 மணி நேரம் ஆகும் சூழ்நிலை நிலவுவதால், பேருந்து சேவைகளில் காலதாமதம் ஏற்படுவதாகப் பயணிகள் தெரிவிக்கின்றனர்.
இதனால் பேருந்து நிலையங்களில் குழந்தைகளுடன் வரும் தாய்மார்கள், முதியவர்கள், பெண்கள், மாணவர்கள் மற்றும் தொழிலாளர்கள் மணிக்கணக்கில் காத்திருக்கும் அவல நிலை ஏற்பட்டுள்ளது.
### குன்னூர்–உதகை வழித்தடத்திலும் பேருந்துகள் பற்றாக்குறை!
இதேபோன்று குன்னூரிலிருந்து உதகைக்குச் செல்லும் பேருந்துகளின் எண்ணிக்கையும் போதுமானதாக இல்லை என்ற குற்றச்சாட்டு எழுந்துள்ளது.
குறிப்பாக, காலை நேரங்களில் அரசுப் பணியாளர்கள், தனியார் நிறுவன ஊழியர்கள், கல்லூரி மாணவ, மாணவிகள் மற்றும் அன்றாட வேலைக்குச் செல்லும் தொழிலாளர்கள் உரிய நேரத்தில் தங்கள் பணியிடங்களுக்குச் செல்ல முடியாமல் சிரமப்படுகின்றனர்.
பேருந்துகளுக்காக நீண்ட நேரம் காத்திருப்பதால் பொதுமக்களின் அன்றாட வாழ்க்கை பாதிக்கப்படுவதுடன், மாணவர்களின் கல்வி மற்றும் தொழிலாளர்களின் வாழ்வாதாரமும் பாதிக்கப்படும் சூழ்நிலை உருவாகியுள்ளது.
### பொதுமக்கள் நலன் கருதி கூடுதல் பேருந்துகள் இயக்க வேண்டும் – பாஜக வலியுறுத்தல்!
இந்தச் சூழ்நிலையில், பொதுமக்களின் நலனைக் கருத்தில் கொண்டு தமிழ்நாடு அரசுப் போக்குவரத்துக் கழகம் மற்றும் சம்பந்தப்பட்ட துறை அதிகாரிகள் உடனடியாக நடவடிக்கை மேற்கொள்ள வேண்டும் என பாஜக சார்பில் கோரிக்கை விடுக்கப்பட்டுள்ளது.
குன்னூர்–கோத்தகிரி–மேட்டுப்பாளையம், குன்னூர்–கோவை மற்றும் குன்னூர்–உதகை வழித்தடங்களில் தேவைக்கேற்ப கூடுதல் பேருந்துகளை இயக்க வேண்டும். குறிப்பாக, காலை மற்றும் மாலை நேரங்களில் பணிக்குச் செல்வோர், பள்ளி மற்றும் கல்லூரி மாணவர்கள் பயன்பெறும் வகையில் சிறப்புப் பேருந்துகளை இயக்க நடவடிக்கை எடுக்க வேண்டும் என வலியுறுத்தப்பட்டுள்ளது.
மேலும், பார்லியார் பகுதியில் நடைபெறும் சாலைச் சீரமைப்புப் பணிகளைப் பாதுகாப்பு விதிமுறைகளுக்கு உட்பட்டு விரைவுபடுத்தி, போக்குவரத்தை மீண்டும் இயல்பு நிலைக்குக் கொண்டுவர நடவடிக்கை எடுக்க வேண்டும் என்றும் கேட்டுக்கொள்ளப்பட்டுள்ளது.
“இயற்கைப் பேரிடரைத் தடுக்க முடியாவிட்டாலும், அதனால் ஏற்படும் மக்கள் துயரத்தைத் தணிக்க முடியும். பொதுமக்களின் நலனே முதன்மை என்பதை உணர்ந்து, குன்னூர் பகுதி மக்களின் போக்குவரத்துப் பிரச்சினைக்குத் தமிழக அரசும் மாவட்ட நிர்வாகமும் உடனடித் தீர்வு காண வேண்டும்” என பாஜக சார்பில் வலியுறுத்தப்பட்டுள்ளது.
.