கோவை இருகூரில் பெண் காரில் கடத்தப்பட்ட சம்பவம் : பாதிக்கப்பட்ட பெண்ணிடம் விசாரணை நடத்திய காவல்துறை – வீடியோ வெளியிட்ட !!!

கோவை நவ 7,
கோவை, இருகூரில் நேற்று இரவு காரில் பெண் கடத்தப்பட்டதாக சி.சி.டி.வி காட்சிகள் வெளியாகி பரபரப்பை ஏற்படுத்தியது. இதுகுறித்து சம்பவத்தை நேரில் பார்த்த பெண்ணிடம் காவல் துறையினர் விசாரணை செய்த ஆடியோ வெளியாகி உள்ளது. மேலும் பாதிக்கப்பட்ட பெண்ணிடம் காவல் துறையினர் விசாரணை நடத்திய வீடியோ தற்பொழுது வெளியாகி உள்ளது.

அந்த வீடியோ காட்சியில் அவரும் அவர் கணவர் மற்றும் குழந்தை வெளியே துணிகளை தைக்க சென்று வந்ததாகவும், அப்பகுதியில் உள்ள பேக்கரியில் டீ சாப்பிட்டு விட்டு வந்ததாகவும்,  ராவுத்தர் பிரிவு அருகே பழங்கள் வாங்க கணவர் இறங்கக் கூறியதாகவும், அப்பொழுது இறங்க முடியவில்லை என்று அந்தப் பெண் கூறியதாகவும், அப்பொழுது சாதாரணமாக வந்து கொண்டு இருந்ததாகவும், அப்பொழுது இப்படியே பேசிகிட்டு எங்கேயும் கூப்பிட்டு செல்லாதே ? சந்தோசமாக வைத்துக் கொள்ளாதே ? என கேட்டதாகவும், கீழே இறங்க அதற்கு வீட்டிற்கு சென்றால் பெரிய பிரச்சனையாகி விடும் என்று கணவர் வா, வா என்று கூப்பிட்டதாகவும், அதற்கு தான் வரவில்லை என்று கூறியதாகவும், அப்பொழுது காருக்குள் பிடித்து இழுத்து வீட்டில் போய் பேசி கொள்ளலாம் என்று அடுத்ததாகவும், அதற்கு அந்தப் பெண்ணும்  நான் உன்னிடம் அடி வாங்கணுமா என்று திருப்பி அடித்ததாகவும் அதற்கு பையன் ஏன் இப்படி மான மரியாதையை வாங்குகிறீர்கள் முதலில் காரை எடுங்கள் என்று கூறியதாகவும் பிறகு கிளம்பி வந்ததாக அந்தப் பெண்  காவல் துறையினரின் விசாரணையில் கூறுகிறார், அந்த வீடியோ தற்பொழுது காவல்துறையினர் வெளியிட்டு விளக்கம் அளித்து உள்ளனர்.

மேலும் காவல்துறை வெளியிட்டு உள்ள அறிக்கையில்

கோவை மாநகர காவல்துறை கட்டுப்பாட்டறைக்கு தொலைபேசி அழைப்பில் பேசிய ஒரு நபர், கோவை மாநகர் சிங்காநல்லூர் காவல் நிலைய எல்லைக்கு உட்பட்ட A.G புதூர் ரோட்டில் ஒரு காரில் ஒரு பெண்ணை யாரோ கடத்துவதாக தகவல் கூறி உள்ளார். இதைத் தொடர்ந்து கோவை மாநகர கட்டுப்பாட்டு அறையில் இருந்து, சிங்காநல்லூர் காவல் நிலைய பகுதி உள்ளிட்ட கோவை மாநகரத்தில் உள்ள அனைத்து காவல் நிலைய பகுதிகளில் ரோந்திலும் மற்றும் சுற்றுக் காவலிலும் இருந்த காவலர்கள் மற்றும் அனைத்து காவல் அதிகாரிகளும் உஷார் படுத்தப்பட்டு பல தனிப்படைகள் அமைக்கப்பட்டு, தேடுதல் வேட்டை மேற்கொள்ளப்பட்டது. தனிப்படையினர் மேற்படி கார் தென்பட்ட A.G புதூர், இருகூர் சாலை, திருச்சி சாலை மற்றும் சூலூர் சாலை உள்ளிட்ட அனைத்து சாலை பகுதிகளிலும் தேடுதல் பணி மேற்கொண்டு, அங்கு இருந்த சுமார் 200-க்கும் மேற்பட்ட CCTV காட்சிகளை பார்வையிட்டு, இறுதியாக மேற்படி வாகனத்தையும், அதில் பயணித்தவர்களையும் கண்டறிந்து, அவர்களிடம் நடத்திய விசாரணையின் போது

நேற்றைய தினம் காவல் கட்டுப்பாட்டு அறைக்கு வந்தது போன்று எந்த ஒரு
பெண்மணியும் கடத்தப்படவில்லை என்பது வந்து உள்ளது என்றும், மேலும் நடத்திய விசாரணையில் கடத்தப்பட்டதாக கூறப்பட்ட காரில் பயணித்தவர்கள் இருகூர் பகுதியைச் சேர்ந்த ஒரு குடும்பத்தினர் என்பதும், கணவன் மனைவிக்கு இடையே பொருட்கள் வாங்குவது தொடர்பாக வாக்குவாதம் ஏற்பட்டு உள்ளது என்பதும், அப்பொழுது A.G புதூர் ஜங்ஷன் இடத்தில் வாகனத்தை நிறுத்தி விட்டு அவர்களுக்குள் வாய்த் தகராறு நடந்து உள்ளது என்பதும், தொடர்ந்து வாய்த் தகராறில் இருந்தவாறே வண்டியை எடுத்துச் செல்லும் போது கணவன் மனைவிக்கு இடையே ஏற்பட்ட கூச்சலை கண்ட அங்கு இருந்த ஒரு நபர், யாரோ ஒரு பெண்ணை காரில் கடத்துகிறார்கள் என்று தவறாக எண்ணி, உடனடியாக காவல் கட்டுப்பாட்டு அறைக்கு தகவல் அளித்து உள்ளார் என தெரியவருகிறது.

விசாரணையில் மேற்படி குடும்ப பிரச்சனை தொடர்பாக காருக்குள் நடந்த வாய்த்தகராறு பற்றி அவர்கள் தங்கள் குடும்பத்தைச் சேர்ந்த யாரிடமும் பகிராததால் அது வெளி உலகிற்கு தெரியாமல் போய்விட்டது என்பது தெரிய வருகிறது என்றும், மேலும், இந்நிகழ்வில் காரில் சம்பவம் நடந்ததாக தெரிவித்த நபரையும் கண்டறிந்து விசாரணை செய்தபொழுது அவரும் காரில் யாரும் கடத்தப்பட்டதாக தான் பார்க்கவில்லை எனவும், காரில் இருந்தவர்கள் அதில் இருந்த ஒரு பெண்மணியிடம் தகராறில் ஈடுபட்டதாகவும், கூச்சலிட்டதை பார்த்ததாகவும் தெரிவித்து உள்ளார்.

இச்சம்பவத்தில், உண்மையை வெளிக்கொண்டு வர, கோவை மாநகர காவல் துறையினர் தொடர்ந்து இரவு, பகல் பாராது சம்பவம் நடந்த இடத்தில் இருந்து, இறுதியாக கண்டறியப்பட்ட மேற்படி குடும்பம் வசிக்கும் நகர் வரை உள்ள அனைத்து CCTV தரவுகளையும் ஆராய்ந்து, சம்பவத்தில் ஈடுபட்டவர்களை கண்டுபிடித்து விசாரித்த போது, காருக்குள் தகராறில் ஈடுபட்ட இருவரும் கணவன் மனைவி என்பதும், அவர்கள் பொருள் வாங்குவது தொடர்பாக தங்களுக்குள் ஏற்பட்ட விவாதத்தின் போது கூச்சலிட்டு வாய்த்தகராறு செய்து கொண்டதும், அதன் உண்மை விபரம் தெரியாமல், சாலையில் இருந்து பார்த்து தகவல் தந்த நபர் தவறுதலாக எண்ணி, மேற்படி பெண்ணை கடத்திச் செல்வதாக காவல் கட்டுப்பாட்டறைக்கு தகவல் அளித்து உள்ளது தெரிய வருகிறது.

மேலே கண்ட சம்பவத்தில் தொடர்புடைய குடும்பத்தினரின் நலன் கருதி அவர்கள் பற்றிய விபரம் எதுவும் அளிக்கப்படவில்லை என்பதை தெரிவித்துக் கொள்ளப்படுகிறது என்றும், மேற்படி சம்பவம் தொடர்பாக, தொய்வின்றி, கண்ணும் கருத்துமாக முழுநோக்குடன் சிறப்பாக செயல்பட்டு உண்மையை வெளிக்கொண்டு வந்த காவல் துறையினர் அனைவருக்கும் கோவை மாநகர காவல் ஆணையர் ஆ.சரவண சுந்தர்,  வாழ்த்துக்களையும், பாராட்டுக்களையும் தெரிவித்துக் கொண்டதாக அதில் தெரிவிக்கப்பட்டு உள்ளது.